00:00 26 января 2010 г.
- Районти тĕп библиотека фончĕ 23 экземпляр краеведени кĕнекипе пуянланнă. Вĕсен хушшинче легендарлă Андриян Николаев çинчен С.Николаев çырнă «3-мĕш космонавтăн юлнă пуянлăхĕ» тата тăванĕсемпе çывăх çыннисен аса илĕвĕсен кĕнеки уйрăмах паллă вырăн йышăнать.
- РФ Пенси фончĕн Чăваш Республикинчи уйрăмĕн пуçлăхĕ Р.Кондратьева «Валоризаци итогĕсем тата социаллă тÿлев» темăпа электронлă пресс-конференци ирттернĕ.
- Хĕрарăмсен районти канашĕн членĕсемпе ял тăрăхĕсенчи специалистсем Кивĕ Вăрмар ял тăрăхне тухса пĕрлехи пĕрремĕш канашлу ирттернĕ. Унта ялти хĕрарăмсен ĕçпе канăвне йĕркелес ыйту тĕп вырăнта пулнă.
- «Ачасен ячĕпе, ачасемшĕн» ыр кăмăллăх марафонĕ старт илнĕ. Тĕллевĕ - инвалид ачасене, сахал тупăш илекен, нумай çемьеллĕ, йывăрлăха кĕрсе ÿкнĕ ачасене пулăшасси.
- Район администрацийĕ çумĕнчи çул çитмен ачасемпе вĕсен прависене хÿтĕлес енĕпе ĕçлекен яланхи комиссин пĕрремĕш ларăвĕ иртнĕ. 2010 çулхи ĕç планне çирĕплетнĕ.
- Куславккари «Атăл» физкультурăпа спорт комплексĕнче «Кăшарни ишевĕсем» уçă чемпионат иртнĕ. Пирĕн район команди унта хутшăнса пĕрремĕш вырăн йышăннă.
- Районти Культурăпа кану центрĕнче вĕрентÿ ĕçченĕсемпе педагогика ветеранĕсем хутшăннипе кăçалхи çулталăка «Вĕрентекен çулталăкĕ» тесе пĕлтернине савăнăçлă лару-тăрура уçнă.