00:00 03 октября 2009 г.
Кăçал çăвĕпех сĕт хакĕ Тикаш ял тăрăхĕнче - 4-4,50 тенкĕпе танлашнă пулсан, сентябрь уйăхĕнче икĕ хут 50-шар пус ÿснĕ. Октябрĕн 1-мĕшĕнчен пуçласа вара сĕтĕн сутлăх хакĕ Тикаш ял тăрăхĕнче кăна мар, районĕпех ÿснĕ. Пĕр литр сĕте 6 тенкĕ те 50 пуспа илеççĕ. Ку ял çыннисемшĕн лайăх хыпар, уйрăмах пенсионерсемшĕн. Ялта пурăнакан хресчен яланах килте ĕне выльăх тытнă. Выльăхсăр пурăнма хăнăхманскерсем, сĕт хакĕ палăрмаллах ÿссен, ватлăха пăхмасăрах килти ĕне выльăха малалла та усрасшăн. Сĕт хакĕ хăпарни пенсионерсемшĕн Ваттисен кунĕнче хăйне евĕрлĕ пĕчĕк парне пекех пулнă. Тикаш ял тăрăхĕнче пурăнакансем çакăн хыççăн килти сĕте ытларах сутма тытăнни сисĕнет. Выльăх-чĕрлĕх продукчĕсене туса илесси ансатах маррине аранах ăнланчĕç пулас. Сĕт хакĕ малашне те хăпарсах пырасса шанаççĕ килте выльăх усракансем. Сĕт хакĕ ÿссен ял çыннин кĕсйи хулăмланатех.