Новости » Сергей Иванов Парижра çĕнтернĕ

00:00 25 июля 2009 г.

«Катюша» Раççей командин велосипедисчĕ, пирĕн ентеш Сергей Иванов иртнĕ канмалли кунсенче чи сумлă «Тур де Франс» ăмăртăвăн пĕр этапĕнче çĕнтернĕ. Спортсмен Кальмар тата Безансон тăвĕсен хушшинче 200 километрлă дистанцире вăй виçнĕ. 34 çулти Сергей Шупашкарта иртнĕ Раççей чемпионатĕнчи пекех ушкăнран пирваях мала тухман. Юлашки 190-мĕш километрта вăл тин малтисене хăваласа çитнĕ. Финишчен 500 метр юлсан вара пысăк хăвăртлăхпа пуринчен те иртсе кайнă. Чăваш спортсменĕ тĕнчери чи вăйлă велосипедистсене – Джордж Хинкепи американпа Даниэл Беннати итальяна – кая хăварма пултарнă. Унăн кăтартăвĕ – 4 сехет те 37 минут та 46 çеккунт, Николас Роке ирландец ăна 16 çеккунт выляса янă.Швейцари командин велосипедисчĕ Хайден Роулстон виççĕмĕш пулнă.