08:52 07 декабря 2013 г.
Ноябрĕн юлашки кунĕнче Чăваш Республикин Пуçлăхĕ М.Игнатьев Тĕп çар округĕн йĕркелÿпе мобилизаци управленийĕн штабĕн ертÿçипе А.Линьков генерал-майорпа тĕл пулнă. Ун хыççăн РФ Хĕç-пăшаллă Вăйĕсен Çар управленийĕн органĕсен çар учетне çÿллĕ шайра йĕркелес тĕллевпе ирттернĕ смотр-конкурсра мала тухнăшăн Чăваш Республикине Раççей Федерацийĕн Оборона министерствин вымпелне панă çĕре хутшăннă.
Асăннă тупăшăва ирттерме Раççей Правительствин Постановленийĕпе 2006 çулта йышăннă. РФ Оборона министерствин конкурс комиссийĕ 2013 çулхи апрель уйăхĕнче Чăваш Республикинчи çар комиссариачĕсемпе вырăнти хăй тытăмлăх органĕсем саппасри çар çыннисене мĕнле шута илнине, вĕсемпе мĕнле ĕçленине тĕрĕсленĕ. Конкурс комиссийĕн пĕтĕмлетĕвĕпе федераци субъекчĕсен хушшинче Чăваш Ен пĕрремĕш вырăн йышăннă. «Çак çитĕнÿ республика правительствин, муниципалитет йĕркеленĕвĕсен, администраци пуçлăхĕсен, çар комиссариачĕн пайĕсен кулленхи тăрăшуллă пĕрлехи ĕçĕпе пулнă», - тенĕ А.Линьков генерал-майор. Вăл Чăваш Ен Пуçлăхĕ çитĕнекен ăрăва патриотла воспитани парас тĕлĕшпе пысăк ĕç тунине, «Орленок», «Зарница» çар вăййисем тăтăш ирттернине палăртнă.
Раççей Федерацийĕн Хĕç пăшаллă Вăйĕсен тĕллевĕсене пурнăçлама пысăк тÿпе хывнăшăн Чăваш Республикин Пуçлăхне М.Игнатьева, Канаш район администрацийĕн пуçлăхне В.Софронова РФ Оборона министерстви ячĕпе алла çыхмалли сехетпе чысланă. Смотр-конкурса пирĕн республикăри пур ял-хула тăрăхĕсем хастар хутшăннă.
Иккĕмĕшпе виççĕмĕш вырăнсенче - Ставрополь крайĕпе Тамбов облаçĕ.
Автономное учреждение Чувашской Республики «Редакция Урмарской районной газеты "Хĕрлĕ ялав" ("Красное знамя") Министерства информационной политики и массовых коммуникаций Чувашской Республики