14:53 27 ноября 2013 г.
Чăваш Ен Пуçлăхĕ М.Игнатьев Пĕрлехи информаци кунне хутшăннă май Шупашкарти тĕрлĕ объектра пулнă.
Михаил Васильевич тĕп хулари ачасен ÿнер шкулĕпе паллашнă. Кунта тĕрлĕ программăпа 530 ача тÿлевсĕр вĕренет. 2011 çултанпа дистанци мелĕпе хевтесĕр ачасене те вĕрентеççĕ. Чăваш Ен Пуçлăхне курав залне, ачасен этнографи музейне, классене кăтартнă, çавăн пекех М.Игнатьев он-лайн режимпа йĕркеленĕ урокра пулнă.
Унтан М.Игнатьев Шупашкарти строительство профилĕсен «СТэП» заводне çитнĕ. Предприяти тăрă витмелли, стена тумалли çĕнĕ йышши материалсем кăларса сутать, вĕсемпе промышленноçра, çурт-йĕр строительствинче анлă усă кураççĕ, Чăваш Ен Пуçлăхĕ, тĕп хулан тата унăн администрацийĕн пуçлăхĕсем Л.Черкесовпа А.Ладыков, пĕрле килнĕскерсем, кунта ĕçлекенсен ыйтăвĕсене хуравланă.
Малалла ЧР пуçлăхĕ «Дорэкс» АУО техникăна хĕле мĕнле хатĕрленине тĕрĕсленĕ.Кунта тăрăшакансен коллективĕпе тĕл пулса ыйтусене хуравланă май Михаил Васильевич республикăра çамрăксене спортпа туслаштарас тĕллевпе нумай сооружени туни çинчен каласа панă. «Компьютерпа телевизор пирĕн ачасене магнит пекех туртаççĕ. Апла ан пултăр тесен урама тухмалла, спорт площадкисенче пулмалла - вĕсем нумай картишре пур. Республикăра халăха спорт сооруженийĕсемпе тивĕçтересси 40 процентпа танлашать.
М.Игнатьев нумай хваттерлĕ çуртсенчи пулăшу ĕçĕсен тарифĕсем ÿснипе, сахал тупăшлă тата нумай ачаллă çемьесене субсидисемпе пулăшассипе çыхăннă ыйтусене те çĕкленĕ.
Автономное учреждение Чувашской Республики «Редакция Урмарской районной газеты "Хĕрлĕ ялав" ("Красное знамя") Министерства информационной политики и массовых коммуникаций Чувашской Республики