16:01 17 августа 2013 г.
ЧР Пуçлăхĕ М.Игнатьев Болгарири София хулинче иртнĕ Сурдлимп вăййисене хутшăннă спортсменсемпе тата тренерсемпе тĕл пулнă.
Унта ЧР Патшалăх Канашĕн Председателĕн тивĕçĕсене пурнăçлакан О.Мешковпа ЧР физкультурăпа спорт тата туризм министрĕ С.Мельников та пулнă.
М.Игнатьев ăмăртура палăрнă çамрăксене çитĕнÿсемпе саламланă, вĕсенчен республикăри ытти хĕр-упраçпа яш-кĕрĕм тĕслĕх илессе шаннине пĕлтернĕ, тренерсене, спортсменсене çĕнтерÿсем тума хавхалантарса пынăшăн тав тунă. Республика Пуçлăхĕ Сурдлимпиадăра пысăк çитĕнÿсем тунăшăн ЧР спортăн тава тивĕçлĕ мастерне, тĕнче чемпионачĕн кĕмĕл призерне А.Андреева «Чăваш Республики умĕнчи тава тивĕçлĕ ĕçсемшĕн» орден медалĕпе тата укçа премине илме май паракан сертификатпа чысланă. Ăмăртура «кĕмĕл» çĕнсе илнĕ И.Пакин, М.Ефремовпа пĕрле бадминтонла выляса виççĕмĕш вырăн йышăннă А.Седова тата С.Морозова тренер М.Игнатьев аллинчен Чăваш Рсепубликин Хисеп грамотине илнĕ.
Сурдлимпиадăна хутшăннă А.Мамлина тата Шупашкарти ачасемпе çамрăксен 1-мĕш спорт шкулĕнче тăрăшакан В.Васильев, А.Прохоров, Н.Тонина тренерсем Республика Пуçлăхĕн Тав хутне тивĕçнĕ. Пурте преми илме май паракан сертификатлă пулнă.
Бадминтон турнирĕнче бронза медаль çĕнсе илнĕ Анастасия Седова хăйĕн çитĕнĕвне пьедесталăн виççĕмĕш картлашки çине хăпармасăр та ĕненмен. Шупашкарти ачасемпе çамрăксен 1-мĕш спорт шкулĕнче ăсталăхне туптакан пике савăннипе куççульленнĕ те.
Автономное учреждение Чувашской Республики «Редакция Урмарской районной газеты "Хĕрлĕ ялав" ("Красное знамя") Министерства информационной политики и массовых коммуникаций Чувашской Республики