14:02 29 июня 2013 г.
Чăваш Ен Интернетпа çыхăнтарнă çурт-йĕр шучĕпе федерацин Атăлçи округĕнчи регионсен рейтингĕнче 2-мĕш вырăн йышăннă. Ку - Росстатăн 2012 çулхи тĕпчевĕн кăтартăвĕсем.
Ведомство пĕтĕмлетнĕ тăрăх - республикăри Интернетпа çыхăнтарнă кил хуçалăхĕсен тÿпи 65,4 процентпа танлашнă. Удмурти çеç Чăваш Енрен маларах. Кÿршĕ регионта халăхăн 70 процент йышĕ виртуаллă тĕнчене килти компьютерсенчен тухать. 3-мĕш вырăнта - Самар облаçĕ (64,2 процент).
Сетьпе çыхăнмалли майсен чи пĕчĕк тÿпи - Пенза облаçĕнче (37 процент) тата Мари Элта (42,8 процент).
Чăваш Енре пурăнакансем Интернетпа усă курса ытларах социаллă сетьсенче хутшăнаççĕ (93 процент), хыпарсемпе паллашаççĕ (74 процент), фильмсем, кĕвĕсем тата вăйăсем çыртарса илеççĕ (74 процент). Йышăн 42 проценчĕ Интернетра таварсемпе, пулăшу ĕçĕсемпе çыхăннă информаци шырать, Интернет-лавккасемпе усă курать. Республикăра пурăнакансен 14 проценчĕ влаç органĕсен сайчĕсенчен информаци илет, унта документсем хатĕрлет.
Тĕпчеве округри 9,4 пин кил хуçалăхне явăçтарнă, çав шутра 500-шĕ - Чăваш Енрисем. Респондентсем анкетăсенче хуравсен темиçе вариантне суйласа илме пултарнă.
Танлаштарма: 10 çул каялла кăна-ха Интернет сăмаха чылайăшĕ илтмен те пулĕ. Халĕ вара кашни шкул ачи, кĕçĕн классенчисене илес пулсан та, унта кĕме, кирлĕ информаци илме пултараççĕ.
Автономное учреждение Чувашской Республики «Редакция Урмарской районной газеты "Хĕрлĕ ялав" ("Красное знамя") Министерства информационной политики и массовых коммуникаций Чувашской Республики