09:04 27 апреля 2013 г.
Чăваш патшалăх оперăпа балет театрĕнче «РЕЛАВЭКСПО-2013» курав иртнĕ. Шупашкара çĕршывăн энергетика тата релестроени тĕп хули тесе йышăннăранпах-тăр вăл çак чыса иккĕмĕш хут тивĕçнĕ.
Курава тата «Раççейри электроэнергетика тытăмĕн автоматизацийĕпе реле хÿтĕлевĕ» конференцие Чăваш Ен Пуçлăхĕ М.Игнатьев хутшăннă. Малтанах Михаил Васильевич конференцие уçса сăмах каланă, Раççей Пĕтĕм тĕнчери суту-илÿ организацине кĕнĕрен мероприяти пĕлтерĕшне пысăк хак панă. Чикĕ леш енче тавар туса кăларакан вăйлă чылай компанипе хăюллăнах тупăшăва кĕнине, çавна май пахалăха татах ÿстермеллине палăртнă.
Пĕлтĕр пĕрремĕш тĕл пулăва Раççейри тата урăх çĕршывсенчи малта пыракан компанисен 500 специалисчĕ хутшăннă, кăçал - 750 представитель. Делегатсем 1,5 хут ытларах пулни мероприяти ят-сумне, чысне çĕклет. Вĕсем пирĕн çĕршывăн 52 регионĕнчен, çавăн пекех Австрирен, Канадăпа Францирен, Беларуçпа Украинăран килнĕ. Форума хăнасем электроэнергетикăн тĕрлĕ тытăмĕнчен, проект организацийĕсенчен, тĕпчев центрĕсенчен, инноваци предприятийĕсенчен, çавăн пекех çĕршывăн 20 аслă вĕренÿ заведенийĕнчен хутшăннă.
Энергетиксен уявĕн тĕп спонсорĕ - «ЭКРА» тулли мар яваплă общество. Обществăн коллективĕ çамрăк, пысăк пĕлÿллĕ специалистсем - ăслăлăх кандидачĕсемпе докторсем таранах - вăй хураççĕ. Республика Пуçлăхĕ ĕçпе тивĕçтерекенсем 3-4-мĕш курссенчи студентсене те производствăна йышăннине пĕлтернĕ. Отрасльте кадр ыйтăвне татса панă. Специалистем энергетика тытăмĕн хăрушсăрлăхне туса хурассишĕн вăй хураççĕ. Вĕсене ăсталăха ÿстерме, пултарулăха туптама тĕрлĕ шайри влаç органĕсем май пур таран пулăшаççĕ.
Тĕнчери экономика рынокĕ çулленех инновациллĕ çĕнĕ таварпа пуянланать, пахалăхĕ лайăхланса, хакĕ хушăнса пырать. Малашне электроподстанци те ахаль йышши мар, цифрăлли пулĕ. Специалистсем çавăнпах пурнăç аталанăвĕнчен çур утăм та пулин маларах пыма, электроэнергетика енĕпе пĕлĕве тарăнлатма тăрăшаççĕ.
Автономное учреждение Чувашской Республики «Редакция Урмарской районной газеты "Хĕрлĕ ялав" ("Красное знамя") Министерства информационной политики и массовых коммуникаций Чувашской Республики