00:00 07 марта 2013 г.
ЧР Патшалăх Канашĕн иртнĕ 11-мĕш сессийĕнче ку ыйтупа çивĕч тавлашу пулнине кура республикăн вĕренÿ министрĕ В.Иванов журналистсемпе ятарласа курнăçнă, пĕтĕмĕшле пĕлÿ парасси малашне те тÿлевсĕр пулассине тепĕр хут çирĕплетнĕ.
- Саккунсене çĕнетесси - чĕрĕ процесс, - тенĕ Владимир Николаевич, - вăхăт иртнĕ май саккунсене улшăнусем кĕртме тивет - йĕркеллĕ пулăм. Тепĕр енчен, эпир федераци патшалăхĕнче пурăнатпăр, çавна май республика нормисемпе саккунĕсем РФ саккунĕсемпе çураçуллă пулмалла.
ЧР Конституцине РФ Тĕп саккунĕпе килĕшÿллĕ тăвассине депутатсем шавлă сÿтсе явнă, çакă ыйту пирĕн граждансемшĕн чăннипех пысăк пĕлтерĕшлине кăтартать.
Раççейĕн вĕренÿ çинчен калакан çĕнĕ саккунĕнче граждансене пĕтĕмĕшле пĕлÿ парассине виçĕ сыпăка уйăрнă: пĕтĕмĕшле пуçламăш пĕлÿ парасси - 1-4-мĕш классем, пĕтĕмĕшле тĕп пĕлÿ парасси - 5-9-мĕш классем, пĕтĕмĕшле вăтам пĕлÿ парасси - 10-11-мĕш классем. Раççей Федерацийĕн çĕнĕ «Вĕренÿ çинчен» саккунĕн 5-мĕш статйинче граждансем арçын е хĕрарăм, хăш раса çынни пулнине, ыттине пăхмасăр пĕтĕмĕшле пĕлÿ илме пултарнине, кашни сыпăкри вĕренÿ тÿлевсĕррине çирĕплетнĕ. Çак саккунăн тĕп пайĕсем кăçалхи сентябрĕн 1-мĕшĕнчен вăя кĕреççĕ, хăш-пĕр статья - çитес çултан.