00:00 06 февраля 2013 г.
Раççей Правительствин Председателĕ Д.Медведев Шупашкар хулине никĕсленĕренпе - 550, Чăваш автономи облаçне йĕркеленĕренпе 100 çул çитнине хатĕрленсе пурнăçламалли ĕçсен планне çирĕплетнĕ. «Икĕ юбилей хакĕ 25 млрд тенкĕпе танлашать», - тенĕ Чăваш Ен Пуçлăхĕ М.Игнатьев «Миллиардçăсен клубне» кĕрекен предприятисен ертÿçисемпе ирттернĕ «çавра сĕтел» хушшинчи калаçура. Премьер-министр тивĕçлĕ хушăва январĕн 28-мĕшĕнче алă пуснине пĕлтернĕ. Предприяти-организаци ертÿлĕхне çурт-йĕре, сооруженисене паянхи пурнăç ыйтнине тата юбилей уявĕсене шута илсе илемлетме сĕннĕ.
ЧР Экономика аталанăвĕн, промышленноç тата суту-илÿ министерствинчен пĕлтернĕ тăрăх - тĕп хула 550 çул тултарнине хатĕрленме 2013-2019 çулсенче 14,44 млрд тенкĕ уйăрĕç. Уйрăммăн илсен федераци хыснинчен - 3,881 млрд, республикăн пĕрлехи бюджетĕнчен - 4,821 млрд, хысна тулашĕнчи çăл куçран - 5,737 млрд тенкĕ.
Автономи облаçне йĕркеленĕренпе ĕмĕр çитнине хатĕрленсе ирттерме 2013-2020 çулсенче 11,318 млрд тенкĕ куçармалла. Вăл шутран федераци хыснинчен - 4,228 млрд, республикăн пĕрлехи бюджетĕнчен - 4,917 млрд, хысна тулашĕнчи çăл куçран - 2,172 млрд тенкĕ.