00:00 02 февраля 2013 г.
Чăваш Ене Раççей Федерацийĕн Президенчĕн федерацин Атăлçи округĕнчи Полномочиллĕ представителĕ М.Бабич килсе çитнĕ. Шупашкар аэропортĕнче ăна Чăваш Республикин Пуçлăхĕ М.Игнатьев, федерацин Чăваш Республикинчи тĕп инспекторĕ Г.Федоров, Раççей Хăрушсăрлăх службин Чăваш Енри управленийĕн пуçлăхĕ С.Софронов, ЧР шалти ĕçсен министрĕ С.Семенов, официаллă ытти çынсем кĕтсе илнĕ. Пĕр куна тăсăлнă визит вăхăтĕнче М.Бабич М.Игнатьевпа Çĕрпÿ районĕнчи Туçи ялĕнче инкек тÿснĕ çуртри çынсемпе тĕл пулнă, республикăн 2013-2015 çулсенчи бюджетне шайлаштарас ыйтупа канашлу ирттернĕ. Унта çавăн пекех Чăваш Енре пурăнмалли çурт-йĕр строительствине аталантарассине те хускатнă. Полномочиллĕ представитель тĕп хулари электромеханика колледжĕн вĕренÿ центрне çитсе курнă, республикăри професси тĕлĕшĕнчен вăтам пĕлÿ паракан вĕренÿ заведенийĕсен ертÿçисемпе тĕл пулнă. Канашлусенче бюджет тытăмĕн ĕçченĕсен шалăвне ÿстересси, эконом-класс çурт-йĕрне тăвасси, професси вĕрентĕвĕн аталанăвĕ çак тата ытти ыйтăва сÿтсе явнă.