00:00 19 января 2013 г.
Январĕн 15-мĕшĕнче Çĕрпÿ районĕнчи Туçи ялĕнчи 18 хваттерлĕ панельлĕ çуртра газ сирпĕннине пула икĕ çын вилнĕ. Пушарнăйсемпе çăлавçăсем, аварипе çăлав техники синкере сирме васканă. Инкек пулнă çуртран 5 çынна пушар пусмипе урама илсе тухнă. Ишĕлчĕксене тасатса икĕ арçынна туртса кăларнă.
Суранланнăскерсене больницăна ăсатнă. 18 хваттерлĕ çак çуртра 44 çын пропискăра тăрать. Вĕсене вăхăтлăха ача садне тата шкула вырнаçтарнă, çывăрмалли вырăнсемпе тивĕçтернĕ, апат çитереççĕ.
Чăваш Ен Пуçлăхĕ М.Игнатьев Туçи ялĕнче пулнă. Инкек тухнă вырăна пăхса çаврăнсан вăл ĕçлĕ канашлу ирттернĕ.
Пĕтĕм служба васкавлă ĕçленине, кирлĕ мерăсене вăхăтлă йышăннине палăртнă. Синкерте вилнĕ икĕ çыннăн çемйисене 1-ер млн тенкĕ укçа парса пулăшĕç.