00:00 16 января 2013 г.
1991-мĕш çулта районта Чăваш халăх писателĕ ячĕллĕ литература премийĕ туса хунă. Çак хушăра ăна чылай пултаруллă çыравçă тивĕçрĕç. Çак йăлана малалла тăсса конкурса 2013 çулта та ирттерме палăртнă. Унта районта пурăнакан, урăх çĕрте тĕпленнĕ, анчах Вăрмар тăрăхĕнчен тухнă, литература ĕçне кăмăллакан хутшăнма пултарĕ. Ĕçсене декабрь уйăхĕнчен çак адреспа ярса е килсе памалла: Вăрмар поселокĕ, Советсен урамĕ, 8-мĕш çурт, «Хĕрлĕ ялав» хаçат редакцийĕ. Ыйтса пĕлмелли телефон: 2-15-76.
Асăрхаттарни: ĕçсен калăпăшĕ А-4 форматлă пичет хучĕн 1,5 калăпăшĕнчен пысăкрах пулмалла мар.
Вăрмар район администрацийĕ, «Хĕрлĕ ялав» хаçат редакцийĕ, Вăрмарсен Шупашкарти ентешлĕхĕ çирĕплетнĕ Чăваш халăх писателĕ Василий Алентей (Василий Степанович Алендей) ячĕллĕ премие çулсерен журналистикăра тата литературăра палăрнă ентешсене параççĕ.
Преми тĕллевĕ çакăн пек:
- Василий Алентей пултарулăхне халăхра сарасси.
- Тăван литература еткерлĕхне упрасси, çĕнĕ хунавсене малалла аталантарасси.
- Тăван чĕлхепе сăмах илемне литература хайлавĕсем урлă кăтартасси.
- Çамрăк ăрăва паллă ентешсен тĕслĕхĕпе хавхалантарасси.
- Пултаруллă çыравçăсене пичетленме, вулакансен умне тухма майсем туса парасси.
Василий Алентей ячĕллĕ преми виçĕ ятран тăрать:
1. Проза жанрĕпе паракан преми.
2. Поэзи жанрĕпе паракан преми.
3. Публицистика жанрĕпе паракан преми.
Василий Алентей ячĕллĕ преми илме «Хĕрлĕ ялав» хаçатра е ытти хаçат-журналсенче пичетленекен авторсем (вĕсем ВĂРМАРСЕМ пулсассăн) хайлавĕсене е хăйсем, е вĕсен хайлавĕсене ĕç коллективĕсем, обществăлла юхăмсем тăратма пултараççĕ. Конкурса тăратнă ĕçсем конкурс пулассине пĕлтернĕ çулта пичетленмелле.
Конкурс пĕтĕмлетĕвне комисси пăхса тухнă хыççăн декабрь уйăхĕнче «Хĕрлĕ ялав» хаçатра пичетлеççĕ.
Преми фондне учредительсем хăйсем килĕшсе-калаçса татăлнă тăрăх йĕркелеççĕ. Лауреатсем хăйсем те, вĕсен хăйсем те спонсорсем пулма пултараççĕ. Премие Дипломпа пĕрле укçан е урăхла майпа памалли йĕркене учредительсем хăйсем палăртаççĕ. Премие Чăваш пичечĕн Кунĕнче савăнăçлă ларура параççĕ.
Василий Алентей ячĕллĕ преми лауреачĕ ят илме тăратнă ĕçсене пăхса тухса хаклама район администрацийĕн культура, спорт, архив ĕçĕн пайĕ, «Хĕрлĕ ялав» хаçат редакцийĕ, Вăрмарсен Шупашкарти ентешлĕхĕ, районти тĕп библиотека, историпе тавра пĕлÿ музейĕ, тавра пĕлÿçĕсен пĕрлĕхĕн комиссийĕ йĕркелет. Комисси йышĕ район халăхĕшĕн паллă та хисеплĕ пулмалла.
Василий Алентей ячĕллĕ конкурс пулассине çулсерен Чăваш пичечĕн кунĕнче «Хĕрлĕ ялав» хаçат урлă пĕлтереççĕ.