00:00 16 января 2013 г.
Канаш хулинчи Культура керменĕнче «Раштав çăлтăрĕ» фестиваль иртнĕ.
Унта Канаш епархийĕн тытăмне кĕрекен вĕрентÿ учрежденийĕсемпе вырсарни шкулĕсен коллективĕсем хăйсен пултарулăхĕпе савăнтарнă. Фестивале хутшăнакансене Канаш епархийĕн епископĕ Стефан, ЧР Культура министерствин пай пуçлăхĕ М.Краснов, Чăваш Енри Ача прависен уполномоченнăйĕ В.Рафинов, «Раштав» ыр кăмăллăх фончĕн председателĕ З.Паршагина, район администрацийĕн пуçлăхĕ В.Софронов тата ыттисем саламланă. Уявра тĕн темипе çыхăннă юрă-кĕвĕ янăранă, çамрăк артистсем илемлĕ ташшисемпе килентернĕ, театрализациленĕ представленисем те куракансен чунне тыткăнланă. Мероприятие Вăрмар районĕнчи Мăнçырмари Тихвински Турамăш Турăшĕн чиркĕвĕ тата Вăрмарти Михаил Архистратигăн чиркĕвĕ çумĕнчи вырсарни шкулĕсене çÿрекенсем те хутшăннă. Михаил Архистратиг чиркĕвĕ çумĕнчи вырсарни шкулне çÿрекенсен юррине илтсен залра ларакансем куççульленнĕ.