00:00 26 декабря 2012 г.
Кăçал республикăра 11 ача сачĕ хута каймалла. Улттăшĕ шăпăрлансене йышăннă та ĕнтĕ. Вăл шутра иккĕшĕ - Шупашкарта. 2012-2015 çулсенче пурĕ 54 садик çĕклеме палăртнă. Унта 8488 пепке вырăн тупĕ. Черет кĕтсе хăшкăлнă ашшĕ-амăшĕшĕн ку, паллах, лайăх хыпар. Анчах унта ĕçлекенсем çителĕклĕ-и? Çак ыйту та çивĕч-мĕн. Сăмахран, шкул çулне çитменнисен 55 çуртĕнче халĕ - 330 ваканси. Вĕсенчен 236-шĕ - воспитательсемпе пулăшаканĕсем. Çавăн пекех поварсем, пÿлĕмсене тирпейлекенсем те çитмеççĕ.
Нумаях пулмасть патшалăх ĕçпе тивĕçтерекен служби Шупашкарти ача сачĕсенче тăрăшакансем тупас тĕлĕшпе вакансисен ярмăрккине ирттернĕ. Унта пурĕ 7 учрежденин представителĕ хутшăннă. Пурĕ 53 ĕç вырăнĕ сĕннĕ. Ярмăрккăна пынă 71 çынтан 20-мĕшĕ ĕç сĕнекенсемпе тĕл пулса тĕплĕнрех калаçма килĕшнĕ.