00:00 12 декабря 2012 г.
Правительство çуртĕнче Чăваш Республикин Национальноçсен енĕпе ĕçлекен канашĕн ларăвĕ иртнĕ. Ăна вице-премьер - ЧР Пуçлăхĕн Администраци ертÿçи А.Иванов ертсе пынă. Ларăва ĕç тăвакан влаç органĕсен çыннисем, республикăри наци культура пĕрлĕхĕсен ертÿçисем хутшăннă.
Ларура виçĕ ыйту пăхса тухнă. Чăваш наци конгресĕн ĕçĕ-хĕлĕпе çыхăннипе унăн президенчĕ Г.Архипов сăмах илнĕ, конгресăн юлашки тапхăрти ĕçĕсем пирки тĕплĕн чарăнса тăнă, çитес çулхи тĕллевсемпе паллаштарнă.
«Чăваш Республикинче 2012-2014 çулсенче халăх хушшинче хирĕç тăру сиксе тухас хăрушлăха чарса лартас тĕлĕшпе пурнăçламалли комплекслă ĕçсем çинчен» ыйтупа ЧР культура, национальноçсен ĕçĕсен тата архив ĕçĕн министрĕ В.Ефимов калаçнă. Асăннă ыйтупа çыхăннă мероприятисем тĕрлĕ халăх çыннисен хутшăнăвĕсене лайăхлатассипе, пĕр-пĕрне хисеплесе чĕнессипе, çивĕч ыйтусене харкашусăр, йĕркеллĕ татса парассипе, наци тата тĕн никĕсĕ çинче экстремизм сĕмĕсене пĕтерессипе, обществăра культурăпа кăмăл-сипет пахалăхĕсене аталантарассипе çыхăннă. «Тĕрлĕ халăхпа конфесси çыннисем республикăмăрта хăйсене хăтлă, кăмăллă туйни тата пĕр-пĕрне хисеплесе пурăнни кашни халăхăн культурипе йăли-йĕркисене хисеплени - пирĕншĕн уйрăмах пĕлтерĕшлĕ», - тенĕ В.Ефимов.
Чăваш Республикин Национальноçсен енĕпе ĕçлекен канашĕн çитес çулхи ĕç планĕпе ЧР Культура министерствин пай пуçлăхĕ, канашăн секретарĕ М.Краснов паллаштарнă.