00:00 01 декабря 2012 г.
Чăваш Енĕн Информаци политикин министерстви «Чувашия» фондпа пĕрле йĕркеленĕ семинар районсен, республикăри тата федерацин массăллă информаци хатĕрĕсен представителĕсене пухнă.
Мероприятие Чăваш Енĕн информаци политикипе массăллă коммуникацисен министрĕн заместителĕ Л.Шемарина уçнă. Вăл Чăваш Ен район хаçачĕсене упраса хăварма пултарнă регионсен пĕчĕк йышĕнче пĕри пулнине палăртса хăварнă. Юлашки çул хушшинче район хаçачĕсен пĕтĕмĕшле тиражĕ 2,5 процент (85 пин экземпляр) ÿснĕ те. Раççейĕн коммуникацисен асăрхавĕн Чăваш Енри управленийĕ 2012 çулхи октябрĕн 1-мĕшĕ тĕлне 180 массăллă информаци хатĕрĕ регистрациленĕ. Вĕсенчен 138-шĕ - пичетленсе тухакан массăллă информаци хатĕрĕсем (97 хаçат, 34 журнал, 1 бюллетень, 1 альманах, 4 сборник, 1 каталог), 39 - электрон массăллă информаци хатĕрĕсем (11 телепрограмма, 9 радиопрограмма, 12 телеканал, 5 радиоканал, 2 электрон периодика кăларăмĕ), çавăн пекех 3 информаци агентстви. Л.Шемарина информаци рынокĕн аталанăвĕн республикăри пĕтĕмĕшле туртăмĕ тата министерство пăхса тăракан проектсем çинчен каласа панă.
Семинар ĕçĕ малалла икĕ секципе пынă. Тĕп редакторсем «Российская газета» хаçатăн Хусанти представителĕсемпе пĕрле хаçатăн электрон версийĕн вулаканĕсен хисепне ÿстерсе пичет продукцийĕн тиражне те упраса хăварассине сÿтсе явнă. Массăллă информаци хатĕрĕсенче пирус туртассине хирĕç кĕрешмелли кампание планласа йĕркелесе ирттермелли ыйтусене халалланă иккĕмĕш секцире республикăри тата районсенчи массăллă информаци хатĕрĕсен журналисчĕсем хутшăннă. Пирус туртас енĕпе республикăри лару-тăру мĕнлереххи çинчен республикăри тĕп нарколог И.Булыгина каласа панă. Чăваш Ен Пуçлăхĕн Патшалăх право управленийĕн пуçлăхĕн заместителĕ С.Чекрыгина семинара хутшăнакансене пирус туртма чарни право аспекчĕсемпе паллаштарнă.