00:00 31 октября 2012 г.
Чăваш Республикинчи патшалăх ĕç инспекцийĕ кăçалхи 9 уйăхра 642 тĕрĕслев ирттернĕ. Çавна май йĕркене пăснă 3710 тĕслĕх тупса палăртнă, 2968-шĕ ĕç сыхлавĕпе çыхăннă.
Юлашки вăхăтра организацисенче ĕç сыхлавĕ тĕлĕшпе укçа ытларах уйăрма пуçланине палăртаççĕ инспекторсем. Пĕр çын пуçне вăтамран 5088 тенкĕ (2011 çулта - 4455 тенкĕ) тăкакланă. Сывлăхшăн сиенлĕ оборудованипе усă курни, хăрушсăрлăх йĕркине пăхăнманни ĕç хăвăртлăхне чакарнине аса илтереççĕ тĕрĕслевçĕсем.
2012 çулта ĕç вырăнĕнче 66 çын инкеке лекнĕ. 16-шĕн пурнăçĕ татăлнă, 35-шĕ хытах суранланнă. Саккуна пăснăшăн 989 çынна явап тыттарнă, 3750 пин тенкĕ шыраса илнĕ.