00:00 22 августа 2012 г.
Октябрĕн 1-мĕшĕччен Раççей Федерацийĕн Пенси фончĕ урлă çăмăллăхпа усă куракансен 2013 çулта социаллă пакетпа мĕнле усă курасси пирки йышăну тумалла. Енчен те çăмăллăхпа усă куракан гражданин хальччен укçан илсе тăнă, тепĕр çулне вара саккунпа пăхнă ытти çăмăллăхсене илсе тăрас тесен Пенси фончĕн районти управление пырса заявлени çырмалла. Нимĕнле улшăну та тăвас мар текенсене çакă пырса тивмест.
Аса илтеретпĕр, социаллă пакет виçĕ пайран тăрать: эмелсемпе тивĕçтересси, санаторисемпе курортсене каясси, çул çÿресси. Тулли социаллă пакет - 795 тенкĕ те 88 пуспа танлашать. Чăваш Республикинче федераци çăмăллăхĕпе усă куракан 111,3 пин çын. Вĕсем - Аслă Отечественнăй вăрçă участникĕсем, тĕрлĕ çар хирĕç тăрăвĕсене хутшăннисем, вĕсен мăшăрĕсем, инвалидсем, радиаци илнĕ çынсем. Вĕсенчен 89,7 проценчĕ патшалăх паракан çăмăллăхсене укçапа илет.