00:00 08 августа 2012 г.
Чăваш Ен Пуçлăхĕ М.Игнатьев Министрсен Кабинечĕн членĕсемпе, федераци ведомствисен территори органĕсен тата муниципалитетсен ертÿçисемпе эрнесерен йĕркелекен канашлу ирттернĕ.
Чи малтанах вăл канашлăва хутшăннисене Чăваш Ен спортсменки Т.Петрова-Архипова Лондонра иртекен çуллахи XXX Олимп вăййисенче хĕрарăмсен марафон чупăвĕнче бронза медаль çĕнсе илнĕ ятпа саламланă. М.Игнатьев ентешĕмĕр çĕнтерÿшĕн кĕрешсе хăй çирĕп характерлă пулнине кăтартнине палăртнă, унăн çитĕнĕвĕ вара, паллах, республикăри спорт аталанăвне пулăшĕ, çамрăк ăрушăн тĕслĕх пулĕ.
Экономика аталанăвĕн министрĕ А.Табаков социаллă пĕлтерĕшлĕ апат-çимĕç тата çунтармалли-сĕрмелли материалсен хакĕсен мониторингĕн кăтартăвĕсемпе паллаштарнă.
М.Игнатьев паян апат-çимĕçпе суту-илÿ отраслĕн нумай предприятийĕ ял хуçалăх таварĕсем туса кăларакансенчен сĕтпе пахча çимĕçе йÿнĕпе сутăн илнĕ май вĕсене сутнă чух хаксене чакарманнине палăртнă, сутăн илмелли хаксене тĕпчеме хушнă.
Уй-хирти ĕçсем çинчен вице-премьер - ял хуçалăх министрĕ С.Павлов каласа панă.
Кăçалхи январь-июль уйăхĕсенче Чăваш Енре ача çуратасси пĕлтĕрхи çак тапхăртинчен 12,4 процент пысăкланнă, 1000 çын пуçне 13,6-па танлашнă.
Чăваш Ен Пуçлăхĕ Сывлăх сыхлавĕн министерствине больницăсенче пациентсене «Электрон регистратура» пулăшнипе йышăннин кăтартăвĕсене тĕпчеме сĕннĕ, талăкĕпех ĕçлекен киосксенче çĕрле пĕчĕк савăтсемпе спиртлă шĕвексем сутни, саккуна пăсакансене явап тыттармалли çинчен каланă.