00:00 04 августа 2012 г.
Пусăсенчи таса шыв санитарипе гигиена нормисене тивĕçтермест. Тимĕр, бор, марганец тата ытти минерал кирлĕ виçерен икĕ-виçĕ хут пысăкрах. Çавна май çынсем вар-хырăм чирĕсемпе нушаланаççĕ.
Çитменлĕхсене пĕтерес тĕлĕшпе Раççейри тата республикăри «Таса шыв» программăпа килĕшÿллĕн Шăмăршă, Патăрьел тата Комсомольски районĕсенчи ялсене таса шывпа тивĕçтерес шутпа Хырла юхан шыва пĕвелесе плотина тунă. Шыв управĕн лаптăкĕ 420 гектар, тăршшĕ 2 çухрăма яхăн, сарлакăшĕ – 800 метр. Кунта 15,9 миллион кубла метр шыв пуçтарăннă.
Шыв тасатакан сооруженисене пĕлтĕр тума тытăннă. Çак тĕллеве пурнăçлама 525,046 млн тенкĕ укçа куçарнă. Кăçал вара республика бюджетĕнчен 87,550 млн (32, 8 процент), федераци бюджетĕнчен 179,278 млн (67,2 процент) тенкĕ çитнĕ. Станци талăкра 19,2 пин кубла метр шыв хăвалать. Унта уçлакан 8 насус вырнаçтарнă. 2010 çулта шыв тасатакан станцирен пуçласа Шăмăрша çитиччен 38,8 çухрăм шыв пăрăхĕ хывнă.