00:00 28 июля 2012 г.
Кăçал июлĕн пуçламăшĕнче Краснодар крайĕнче шыв илнине пула унта пурăнакан халăх пысăк тăкак тÿснĕ.
«Халăха хÿтĕлес тата пулăшас тесен пирĕн ăна малтан вăл е ку лару-тăрура хăйне мĕнле тытмаллине вĕрентмелле, хăрушлăх сиксе тухсан вара çынсене çакăн пирки вăхăтра тата май килнĕ таран хăвăртрах пĕлтермелле» - тенĕ Раççей МЧСĕн Чăваш Республикинчи Тĕп управленийĕн пуçлăхĕ С.Антонов генерал-майор. Шăпах халăха вĕрентес тĕллевпе Чăваш Енре июлĕн 27-мĕшĕнче централизациленĕ хыпарлавăн регионри системине техника тĕлĕшĕнчен тĕрĕсленĕ.
С.Антонов каланă тăрăх - хыпарлав системисене пирĕн çĕршывра иртнĕ ĕмĕрĕн 70-мĕш çулĕсенчех тунă. Вĕсемпе халăха васкавлă информацие - пĕр-пĕр синкер сиксе тухни е çакăн пек хăрушлăх пурри пирки - пĕлтерме усă кураççĕ. Ку тытăмсене пирĕн республикăра кашни уйăхрах тĕрĕслеççĕ иккен, анчах сиренăсен «сассисене» ямасăр. Çакнашкал мероприятисене малашне те йĕркелессине пĕлтерчĕ С.Антонов.