00:00 18 июля 2012 г.
Июлĕн 14-мĕшĕнче Тăвай ялĕнче тахçантанпах район халăхĕ кĕтнĕ «Аль» физкультурăпа спорт комплексĕ уçăлнă. Чылай районсенче комплекссене Республика кунĕ умĕн уçрĕç. Тăвайсем унччен тăсмарĕç. Чаплă мероприятие Чăваш Ен Пуçлăхĕ М.Игнатьев, республика шайĕнчи, районти, кÿршĕллĕ тăрăхсенчи официаллă çынсем килнĕ.
Республика Пуçлăхĕ çакăн пек спорт объекчĕсене хута яни нумайрах та нумайрах çынсене сывă пурнăç йĕркине тытса пыма явăçтарни çинчен аса илтернĕ, ку вара патшалăх политикин приоритетлă енĕсенчен пĕри. Михаил Васильевич физкультурăпа спорт комплексĕн директорне А.Кириллова юр çийĕн чупакан «Буран» илме сертификат – «çĕнĕ çурта» пушă алăпа килмеççĕ – панă.
«Аль» – республикăри яллă районсенче уçнă 23-мĕш спорт комплексĕ. Кунта спортăн чылай енĕсене аталантарма пур условисем те пур:25 метрлă бассейн, волейболпа баскетбол, мини-футбол вылямалли универсаллă зал, тренажерпа кĕрешÿçĕсен, хореографи залĕсем, сиплев центрĕ. 120 миллион тенкĕ тăракан объекта Пĕтĕм Раççейри «Единая Россия» политика партийĕн тата республикăри «Чăваш Республикинче 2010 - 2020 çулсенче физкультурăпа спорта аталантарасси» социаллă проектсемпе килĕшÿллĕн ĕçе кĕртнĕ.