00:00 14 июля 2012 г.
Шупашкарта июлĕн 3-6-мĕшĕсенче çăмăл атлетсен Раççей чемпионачĕ иртнĕ. Унта Раççейĕн 67 регионĕн, çавăн пекех Киргизи тата Турци командисем ăмăртнă. Çĕнтерÿçĕ ятне илессишĕн 891 спортсмен кĕрешнĕ, çав шутра Раççей спорчĕн тава тивĕçлĕ мастерĕсем - 35, тĕнче класлă спорт мастерĕсем - 105, Раççей спорт мастерĕсем - 172, спорт мастерĕн кандидачĕсем - 83. Атлетсем медальсен 38 комплектне выляса илнĕ. Çапах та чи вăйлисемшĕн Лондонра иртекен çуллахи XXX Олимп вăййисене хутшăнмалли путевка - чи пысăк награда.
Раççей чемпионатне Чăваш Енĕн пĕрлештернĕ команди те хутшăннă, унта 24 спортсмен пулнă. Олимп вăййисене каймалли йыша малтанласа Чăваш Ен представителĕсене те - Т.Архипова, А.Майорова марафонкăсене, Е.Наговицына стайера тата К.Савицкаяна (çăмăл атлетикăн çичĕ енĕпе ăмăртасси) - кĕртнĕ. Çăмăл атлетсен Раççейĕн пĕрлештернĕ командин йышне Раççейĕн Олимп комитечĕн ĕç тăвакан комитетĕнче çирĕплетĕç.
Çăмăл атлетикăн Пĕтĕм Раççейри федерацийĕн президенчĕн В.Балахничев Шупашкарти ăмăртусем çÿллĕ шайра иртнине палăртнă.