00:00 04 июля 2012 г.
Чăваш Енре 300 пине яхăн çамрăк çын пурăнать. Вĕсене Çамрăксен кунĕпе саламласа тĕп хуламăрпа районсенче тĕрлĕ мероприяти иртнĕ.
Шупашкарта, сăмахран, «Çăлтăрпа спорт сехечĕ» регионсен хушшинчи акци тата ташă флеш-мобĕ йĕркеленĕ. Вăрмар поселокĕнче уяв дискотеки иртнĕ. Улатăрта «Пирĕн юхăм» рок-концерт, Канашра «Эпир - çамрăксем» пресс-курав, Элĕк районĕнче яшсен ушкăнĕсен хушшинче футбол чемпионачĕ иртнĕ. Каçал тăрăхĕнче çамрăк мăшăрсене чаплă лару-тăрура çырăнтарнă. Сĕнтĕрвăрри районĕнче велосипедистсем ăмăртнă. Муркаш хĕрĕсемпе каччисем вара «Пуласлăх - çамрăксен аллинче» вĕренÿ форумне хутшăннă. Пăрачкав районĕн çамрăкĕсем хаваслисемпе тавçăруллисен клубĕнче тупăшнă. Тăвай хастарĕсем вара «Çамрăксен тĕнчи» кĕнекесен куравне йĕркеленĕ.
«Çамрăксен пуçарулăхĕсен центрĕнче» юн кун пултаруллă яш-кĕрĕмпе хĕр-упраçа ЧР Çамрăксен патшалăх премийĕпе чысланă. Кăçал ăна Çĕрпÿ районĕнчи Сăнав поселокĕнчи пĕтĕмĕшле вăтам пĕлÿ паракан шкулти физикăпа математика вĕрентекенĕ Ю.Никонов, «ЭКРА» наука-производство предприятийĕ» тулли мар яваплă обществăн станци оборудованийĕн реле хÿтĕлевĕпе автоматикине хатĕрлекен пайĕн 2-мĕш категори инженерĕ В.Петров, Йĕпреçри ачасен искусство шкулĕн театр уйрăмĕн вĕрентекенĕ А.Максютова-Басманцева тата «Центродент» тулли мар яваплă обществăн стоматолог-терапевчĕ И.Ильина тивĕçнĕ.