00:00 27 июня 2012 г.
Республикăн Шалти ĕçсен министрĕ С.Семенов видеконференци мелĕпе канашлу ирттернĕ. Унта министерство уйрăмĕсен, территори органĕсен ертÿçисем хутшăннă. Наркотиксен саккунсăр çаврăнăшне чарас ĕçе полици уйрăмĕсем еплерех хутшăнни пирки уголовлă шырав управленийĕн пуçлăхĕ В.Макеев полковник доклад тунă.
Паянхи куна Чăваш Енри сиплев учрежденийĕсенче - наркотиксăр пурăнайман 2981 çын. Наркомансен йышĕ Шупашкарта, Çĕнĕ Шупашкарта, Канашра тата Çĕмĕрлере ÿссех пырать. Вĕсенчен 60 процент ытла (1810 çын) вăтăр çула çитмен çамрăксем пулни пушшех те пăшăрхантарать. Яшсемпе хĕрсем - çĕршыв пуласлăхĕ-çке. Наркомани эпидеми евĕрех сарăлать. Пĕр наркоман кăна çулсерен 3-5 этеме явăçтарать иккен çав ĕçе.
Наркотиксемпе ăс-тăна сиенлĕ витĕм кÿрекен (психотроплă) япаласен саккунсăр çаврăнăшĕпе çыхăннă 319 преступлени тупса палăртнă. 167 çынна уголовлă майпа явап тыттарнă. Наркопреступлени тунă çул çитмен икĕ çамрăкпа 27 хĕрарăма тытса чарнă.