00:00 23 июня 2012 г.
ЧР Министрсен Кабинечĕн Председателĕ И.Моторин Республика кунне хатĕрленсе ирттерес енĕпе ĕçлекен йĕркелÿ комитечĕн пĕтĕмлетÿ ларăвне ирттернĕ.
«Регионсем - чикĕсĕр ĕçтешлĕх» курава тата Шупашкарти V экономика форумне мĕнле хатĕрленни çинчен экономика аталанăвĕн министрĕ А.Табаков каласа панă. Форума 700 ытла çын хутшăнĕ. Хăнасен йышăнче - РФ Патшалăх Думин депутачĕсем, федерацин ĕç тăвакан влаç тата Раççей субъекчĕсен, ют çĕршывсен (Эфиопи, Литва) представителĕсем.
Уявсем, савăнмалли пысăк сăлтавсем пулĕç. Шупашкар, Кÿкеç тата Ишлей çыннисене çĕнĕ хваттер уççисене парĕç. Шупашкарти «Волжский-3» микрорайонта пурăнакансем вара июнĕн 23-мĕшĕнче хута яракан садике хăйсен ачисене илсе пыма пултарĕç.
Пĕтĕм Раççейри халăх пултарулăхĕн «Раççей çăл куçĕсем» фестивалĕ кăçал хăйĕн юбилейне паллă тăвать. Шучĕпе 20-мĕш фестивале савăнăçлă лару-тăрура уçма шăмат кун Раççейĕн 31 регионĕнчен, çавăн пекех Беларуçпе Украинăран пултарулăх коллективĕсем килеççĕ. Уяв Шупашкарпа тата Кÿкеçпе кăна чикĕленмĕ. Сцена ăстисем Çĕнĕ Шупашкарта, Çĕмĕрлере, Канашра, республикăн ытти хулипе районĕнче те пулĕç.