00:00 20 июня 2012 г.
Лондонра XXX Олимпиада Вăййисене халалласа Пĕтĕм Раççейри XXIII Олимп кунĕ иртнĕ. Çак пулăм ячĕпе йĕркеленĕ велочупăва июнĕн 17-мĕшĕнче Чăваш Ен Пуçлăхĕ Михаил Игнатьев хутшăннă. Мероприятие уçса республика ертÿçи вырсарни кун Шупашкар заливĕ хĕррине пухăннă спортсменсене, спорта юратакансене харпăр хăйĕн вăй-халне, ыранхи куна шанма суннă.
Шупашкар заливĕ хĕрринчи велочупу - Пĕтĕм Раççейри Олимп кунĕн Чăваш Енри халăх чи йышлăн хутшăнакан ăмăртăвĕ. Чăваш Республикинче ăна пуçласа 2011 çулта ирттернĕ. Кăçал, йĕркелÿçĕсем малтанлăха шутланă тăрăх, велочупăва 900 ытла спортсмен хутшăннă. Велочупăва хутшăннисене Раççейĕн Олимп комитечĕн Олимп кунĕн символикиллĕ футболкисемпе дипломĕсене панă.
Çапах та спорта юратакансемшĕн чи пысăк награда, тенĕ республика Пуçлăхĕ, паллах, сывлăх тата лайăх кăмăл-туйăм.