00:00 14 апреля 2012 г.
Пĕтĕм тĕнчери чăваш эстрада юррисен «Кĕмĕл сасă» конкурс-фестивалĕ вун виççĕмĕш хут кĕрлесе иртнĕ. Унта сцена çинче хăйсен вырăнне шыракан çамрăксем вăй виçнĕ. Хăйсен пултарулăхĕпе паллаштарма çĕршывăн тĕрлĕ кĕтесĕнче тĕпленнĕ йăхташăмăрсем килсе çитни уйрăмах кăмăллă. Чăвашсене тăванлăх туйăмĕ пĕрлештернине çирĕплетет çакă. Чăваш, Пушкăрт, Тутар Республикисенчи, Самар, Ульяновск облаçĕсенчи, Красноярск тăрăхĕнчи, Ямал-Ненецк автономи округĕнчи юрăçсен кĕмĕл сасси ян! кайнă.
Уява ЧР культура министрĕн çумĕ Т.Казакова уçнă, çак фестиваль пултаруллă çамрăксене çул уçма пулăшнине, чăваш халăх культурине сыхласа хăварма тата аталантарма май панине палăртнă. ЧР Пуçлăхĕн М.Игнатьевăн салам çырăвне вуласа панă.
Çамрăк юрăçсене хавхалантарма парне нумай хатĕрленĕ. Чăваш наци конгресĕн президенчĕн парнине А.Железнов, М.Давыдова (Самар облаçĕ), Л.Хайбуллина тивĕçнĕ. Жюри шухăшĕпе - Н.Гордеева (Комсомольски районĕ) чи çепĕç юрăпа залри халăхăн кăмăлне çавăрнă. Т.Степанова «Куракансем килĕштернĕ юрăç» çĕнсе илнĕ. А.Михеевăна (Муркаш районĕ) юрă çыртарма 3 пин тенкĕлĕх сертификат панă.
А.Савельева (Пушкăртстан), С.Иванова, Е.Кудряшова виççĕмĕш вырăн йышăннă. И.Федорова (Шупашкар районĕ), О.Саксонская - II степень диплом хуçисем. Пĕрремĕш вырăна Е.Карамзина тухнă. Ăна хаклă парнепе - Хура тинĕс хĕррине канма каймашкăн путевкăпа - савăнтарнă.