00:00 07 марта 2012 г.
Чăваш Ен Пуçлăхĕ районсемпе хуласен администрацийĕсен пуçлăхĕсемпе тĕл пулнă, пурăнмалли çурт-йĕр тăвас ыйтăва пăхса тухнă. Çавна май 2011-2015 çулсем валли йышăннă комплекслă программа пурнăçа кĕнине тишкернĕ, 2012 çул валли тĕллевсем палăртнă.
М.Игнатьев канашлăва уçнă май хваттер ыйтăвĕ чылай çыншăн чи çивĕччи пулнине каланă. «Муниципалитет пĕрлĕхĕсенче çурт-йĕр условийĕсене лайăхлатас текенсем, чылай пулнине кура пирĕн строительство калăпăшне ÿстермелле», - тенĕ вăл. Çивĕч ыйтăва татса пама федераци укçи-тенкипе усă курнисĕр пуçне хушма инвестицисене явăçтарма сĕннĕ.
Строительство министрĕ В.Громов Чăваш Ен пĕлтĕр 886,389 пин тăваткал метр çурт-йĕр хута янине пĕлтернĕ. Пĕр çын пуçне çурт-йĕр лаптăкĕ 0,709 тăваткал метр - ку кăтарту федерацин Атăлçи округĕнче лайăххисен йышăнче. Пĕлтĕр патшалăх пулăшнипе 897 çамрăк çемье хваттер ыйтăвне татса панă. Кăçал ку енĕпе майсем пысăкрах пулнине палăртнă министр. Тĕллеве пурнăçлама 528 млн ытла тенкĕ хывĕç.
2012 çулхи тĕп тĕллевсенчен пĕри яланхи пекех вăрçă ветеранĕсене, тăлăх ачасене тата ашшĕ-амăш хÿттисĕр юлнисене пурăнмалли кĕтеспе тивĕçтересси пулĕ. Çавăн пекех Чăваш Ен патшалăх фончĕн çурчĕсем те çĕкленĕç: хальлĕхе 456 хваттерлĕ икĕ позици тăваççĕ.