00:00 03 марта 2012 г.
Кĕçнерни кун Вăрмарти Культурăпа кану центрĕнче Хĕрарăмсен районти канашĕн черетлĕ канашлăвĕ иртнĕ. Унта район администрацийĕн пуçлăхĕ К.Никитин, ЧР Патшалăх Канашĕн депутачĕ - «АККОНД» УАО генеральнăй директорĕ В.Иванов хутшăннă. Канашлăва Хĕрарăмсен районти канашĕн председателĕ Г.Петрова уçрĕ, хĕрарăмсене çывхарса килекен мартăн 8-мĕшĕнчи уяв ячĕпе саламларĕ. Константин Владимирович та кунта пуçтарăннă хĕрарăмсене Пĕтĕм тĕнчери хĕрарăмсен кунĕ ячĕпе саламласа çирĕп сывлăх, ăнăçу, юрату сунчĕ. Вĕсене тăван район аталанăвĕшĕн туса пыракан ĕçшĕн тав сăмахĕ каларĕ. Çурхи уяв ячĕпе Валерий Николаевич та саламласа пурне те телей сунчĕ. Хăй ертсе пыракан предприятин экономика аталанăвĕпе паллаштарнă май кунта малтанах 500, халĕ 3 пин ытла çын ĕçленине, ĕç вырăнĕсем çулсеренех ÿснине палăртрĕ. Фабрика тутлă, паха, экологи тĕлĕшĕнчен таса кондитерла изделисем туса кăларать, республикăри чи пысăк пилĕк предприятисен шутĕнче. Çавăн пекех Раççей пенсионерĕсен Союзĕн районти уйрăмĕн ĕçĕ çинчен унăн представителĕ Р.Васильева паллаштарчĕ. «Çак организаци 5 çулта, пенсионерсен йышĕ кашни кунах ÿссе пырать», - палăртрĕ вăл.
Тепĕр савăнăçлă самантсенчен пĕри районти тепĕр 7 ача амăшне амăшĕн капиталĕн сертификачĕсене тата «ЧР Ĕç ветеранĕ» ята тивĕçнĕ 3 пенсионера удостоверенисем пани пулчĕ.