00:00 15 февраля 2012 г.
Сочире «КиВиН-2012» фестиваль иртнĕ. Унта Раççей, Германи, Чехи, Украина, Беларуç, Казахстан, Армени, Латви çĕршывĕсенчи 450 команда хутшăннă. Чăваш Енрен - тăватă ушкăн.
Фестиваль пĕтĕмлетĕвĕпе лигăсенче вылякансене палăртнă. Чăваш Ен çамрăкĕсен «Общага» артисчĕсем «Пĕрремĕш канал» телекăларăмăн премьер-лигине кĕме пултарнă. Сăмах май, республикăри КВН командисенчен вĕсем пуçласа çак чыса тивĕçнĕ.
И.Я.Яковлев ячĕллĕ Чăваш патшалăх педагогика университечĕн тата Шупашкарти коопераци институчĕн командисене 2010 çулта КВНăн пĕрремĕш лигине илнĕ, вĕсем унта ăнăçлăрах хутшăнас тесе пĕр ушкăна пĕрлешнĕ. «Общага» командăра асăннă вĕренÿ заведенийĕсен студенчĕсем выляççĕ, лайăх кăтартусемпе савăнтараççĕ.
Студентсен нумай ушкăнĕ хăй вăхăтĕнче «пĕрле пурăнакан çуртра» - «общагăра» пурăннă, хăйсен пĕрлĕхне туптанă. Пĕрлĕхре çитĕнÿ пулнине вара пурте пĕлетпĕр.