00:00 04 февраля 2012 г.
«Чăваш Республикин ĕç ветеранĕ» ята ĕç стажĕпе республикăра 1729 çын илнĕ. Республика Пуçлăхĕн 2012 çулхи январĕн 1-мĕшĕнчи Хушăвĕпе килĕшÿллĕн «ЧР ĕç ветеранĕ» ята пенси илме тивĕçнĕ хĕрарăмсене ĕç стажĕ 40 çултан, арçынсене 45 çултан сахал мар пулсан параççĕ. Çак çĕнĕлĕх пурнăç тăршшĕпе ĕçленĕ, анчах та ветеран ятне тивĕçме пулăшакан патшалăх наградисене илеймен пенсионерсемшĕн калама çук пысăк савăнăç пулчĕ.
Пирĕн районта «ЧР ĕç ветеранĕ» ята кăçал 14 çын илнĕ. Вĕсенчен пĕри Владислав Алексеевич Шашкин. Ĕç стажĕ унăн 46 çул. «ЧР ĕç ветеранĕ» ята тивĕçнине çирĕплетекен удостоверение илни уншăн пысăк савăнăç пулчĕ. 2012 çулхи февралĕн 1-мĕшĕ тĕлне «Халăха социаллă хÿтлĕх паракан Вăрмарти центра» çак хисеплĕ ята илес текен пурĕ 107 пенсионер заявлени тăратнă.