00:00 28 января 2012 г.
Январĕн 23-мĕшĕнче Чăваш Енре Пĕтĕм Раççейри оборонăпа спорт ĕçĕн уйăхлăхĕ пуçланчĕ. Вăл, ытти çулти пекех, февралĕн 23-мĕшĕччен, Тăван çĕршыв хÿтĕлевçин кунĕччен, пырĕ. Çак тапхăрта шкул ачисемпе çамрăксем валли хастарлăх урокĕсем, çарпа патриот тата спорт мероприятийĕсем - уявсем, эстафетăсем, тĕрлĕ ăмăрту - ирттерме палăртнă. Йăлана кĕнĕ тăрăх çамрăк армеецсем слета пухăнĕç, хăйсем Раççей Хĕç-пăшаллă Вăйĕсен ретне тăма мĕнле хатĕрленнине кăтартĕç.
2012 çул - Раççей историйĕн çулталăкĕ, çавна май уйăхлăх вăхăтĕнче çамрăксене сывă пурнăç йĕркине хăнăхтарнипе пĕрлех Тăван çĕршыв историйĕнчи паллă пулăмсемпе те паллаштарма тăрăшĕç. Кăçал Тăван çĕршывăн Аслă вăрçинче тăшмана çапса аркатнăранпа - 67, 1812 çулхи вăрçăра Раççей çарĕ паттăррăн çĕнтернĕренпе - 200, халăх ополченийĕн салтакĕсем Мининпа Пожарский ертсе пынипе Китай-хулана штурмласа илнĕренпе, Мускава Польша интервенчĕсенчен хăтарнăранпа 400 çул çитет. Пирĕн районта та уйăхлăх вăхăтĕнче тĕрлĕ мероприятисем ирттерме палăртнă.