00:00 21 января 2012 г.
Пĕтĕм Раççейри халăх шухăш-кăмăлне ыйтса пĕлекен центр политиксен электорат рейтингĕпе паллаштарнă. РФ Президенчĕн суйлавне çитес вырсарни кун ирттерес пулсан ыйтса пĕлнисен 48 проценчĕ В.Путиншăн сасăланă пулĕччĕ. Раççей премьер-министрĕн электорат рейтингĕ декабрь пуçламăшĕнчипе танлаштарсан 3 процент хăпарнă.
Политика тата экономика коммуникацийĕсен агентствин генеральнăй директорĕ палăртнă тăрăх - камшăн сасăлассине татса пама ĕлкĕрейменнисен сассисене мĕн пур кандидат хушшинче пĕрешкел пайлас пулсан В.Путин пĕрремĕш турта сасăсен 54 процентне яхăн илнĕ пулĕччĕ. Çакнашкал пĕтĕмлетĕве «Общество шухăш-кăмăлĕ» фонд декабрĕн 29-мĕшĕнче ирттернĕ ыйтăм кăтартăвĕсем те çирĕплетеççĕ. Ыйтăма хутшăннисен 52 проценчĕ çĕршывăн хальхи премьер-министрĕшĕн сасăласси пирки каланă. Статистика вара, пĕлетĕр, суймасть.