00:00 29 ноября 2011 г.
Шупашкар хулинчи Ленин районĕнче самбо енĕпе кĕрешсе мала тухассишĕн ирттернĕ уçă чемпионатра Вăрмарти Г.Е.Егоров ячĕллĕ пĕрремĕш вăтам шкулта вĕренекенсем пысăк çитĕнÿ тунă. Хăйсен виçисенче Дима Алексеев, Никита Никитин тата Дмитрий Никитин пĕрремĕш вырăнсене çĕнсе илнĕ, хисеп пьедесталĕн чи çÿллĕ картлашки çине хăпарса тăма тивĕçлĕ пулнă. Кирилл Михайлов иккĕмĕш вырăна тухнă. Александр Мельков виççĕмĕш пулнă. Çĕнтерÿçĕсене дипломсемпе, медальсемпе наградăланă, хаклă парнесем парса чыс тунă.
Çамрăк самбистсене кĕрешÿри ăсталăха туптама СССР спорт мастерĕ Л.Уливанов тренер хăнăхтарать.
Пултаруллă спортсменсем халĕ СССР спорт мастерне С.Уливанова асăнса ирттерекен ăмăртăва хутшăнма хатĕрленеççĕ. Йăлана кĕнĕ ăмăртăва декабрĕн 10-мĕшĕнче йĕркелеме палăртнă.