00:00 29 июля 2011 г.
Июль уйăхĕн вĕçĕ тĕлне республикăри чылай хуçалăх тырă вырма тухнă. Енчен те асăннă уйăхăн 26-мĕшĕ кунĕ тĕлне 55 хуçалăх ĕççине пуçласа 1341 гектар çинчи тĕш тырă тата пăрçа йышши культурăсене çулнă, 1418 тонна тĕшĕленĕ пулсан çак кăтарту кунран-кун ÿссе пырать. Хальлĕхе çанталăкĕ те вырмана хутшăнакансене ытлашшиех чăрмантармасть-ха. Кашни гектартан илекен тухăç 26,6 центнерпа танлашнине пĕлтереççĕ Чăваш Республикин ял хуçалăх министерствинчен.
Тĕрлĕ шайри ял хуçалăх предприятийĕсем çĕнĕ техникăпа пуянланни тыр-пула вăхăтра та çухатусăр пуçтарса кĕртме шанăç парать.
«Хĕрлĕ ялав» хаçатăн иртнĕ номерĕнче «Шигали» ял хуçалăх производство кооперативĕ AGROS-530, «Ямуков Г.Н.» хресчен (фермер) хуçалăхĕ СК-5 «Нива» маркăллă комбайнсемпе пуянланни çинчен пĕлтернĕччĕ. Пĕтĕмпе вара районти пур ял хуçалăх предприятийĕсенче тĕрлĕ маркăллă 34 комбайн шутланать. Çакă çитĕнтернĕ тыр-пула вăхăтра пухса кĕртме шанăç парать.