00:00 26 июля 2011 г.
«Единая Россия» парти ертÿçи В.Путин Пĕтĕм Раççейри халăх фронтне туса хурассине пуçарнăранпа çак юхăм Чăваш Енре те вăй илчĕ. Унăн регионти координаци канашне 20 общество организацийĕ кĕнĕ. Çитес уйăхсенче суйлав çине суйлав пулĕ. Патшалăх Думин депутачĕсен суйлавне хатĕрленсе çак кунсенче çĕршывĕпех праймериз (малтанласа йĕркелекен пĕчĕк суйлав) иртет.
Хăйне евĕр праймериз иртнĕ суйлав умĕн те пулнă, ун чухне списокри çынсемшĕн партире шалта кăна сасăланă. Халĕ вара пĕтĕм халăх сасăлавĕ пулать, вăл Чăваш Енре пилĕк площадкăра (Шупашкарта - икĕ вырăнта, Çĕнĕ Шупашкарта, Канашра, Çĕмĕрлере) июлĕн 25-29-мĕшĕсенче иртет. Кандидатурăсен списокĕнче 27 çын. Пĕтĕмпе 600 суйлавçă сасăлĕ (общество организацийĕсенчен тата партин вырăнсенчи уйрăмĕсенчен - 300-шер çын). Праймеризра çĕнтернисен Дума депутачĕсен ретне тăрас шанăç пулĕ. Чăваш Енрен 3 депутат пулма пултарать.
Сасăлава тăракан кандидатсен списокĕнче 17-шĕ - «Единая Россия» членĕсем, 9-шĕ - парти ретĕнче тăманнисем, 14-шне парти тăратнă, пĕри - хăй тĕллĕн, ыттисем - общество организацийĕсенчен.