00:00 22 июля 2011 г.
Республикăн тĕп хулинче июлĕн 21-24-мĕшĕсенче иртекен çăмăл атлетсен Раççей чемпионачĕн тĕллевĕ уçăмлă: умра - Олимп вăййисен çулĕ. Тăван çĕршывăн чысне унта хÿтĕлекен команда йышне кам кĕресси Шупашкарта палăрĕ. Турнир пĕлтерĕшне спортсменсемпе вĕсен тренерĕсем кăна мар, çăмăл атлетикăна кăмăллакан пур çын та аван ăнланать. Шупашкарта мала тухнисемпе призерсем кăçал Корейăри тĕнче чемпионатĕнче тупăшĕç, унтан вĕсен çулĕ Олимп вăййисене выртĕ.
Чи вăйлă атлетсен Шупашкарти тĕп ăмăртăвĕ çĕршывăн тĕрлĕ регионĕнчен пине яхăн спортсмен килнĕ. «Олимпийский» стадионра хăйсен пултарулăхне туллин кăтартма пĕтĕм услови туса панă. Çакна чемпионат умĕн йĕркелÿ комитечĕ олимп резервĕсен училищинче ирттернĕ пресс-конференцире республика ертÿлĕхне тав туса каланă сăмахсем аван çирĕплетеççĕ.
Раççейĕн чи вăйлă çăмăл атлечĕсем Шупашкарта 2002 çулта вăй виçнĕ, чылайăшĕ çĕршыв, Европа рекорчĕсене çĕнетнĕ.