00:00 08 июля 2011 г.
Июлĕн 3-мĕшĕнче Чăваш Ен Президенчĕ М.Игнатьев тата Тутарстан Президенчĕ Р.Минниханов Пĕтĕм Раççейри чăваш культурин V Уявне хутшăннă.
Тутарстан Республикин Нăрлат районĕнче хаваслă вăйă карти иртнĕ. Хисеплĕ хăнасене çăкăр-тăварпа тата тутарсен наци çимĕçĕпе чак-чакпа кĕтсе илнĕ. Палăртса хăвармалла, тутарсем пирĕн республикăра йышĕ тăрăх виççĕмĕш вырăнта тăраççĕ, чăвашсем те Тутарстанра - виççĕмĕш вырăнта.
Р.Миннихановпа М.Игнатьев импровизациленĕ картишсене кĕрсе тухнă, чăвашсен халăх промыслисен япалисемпе, хăва авса тăвас ăсталăхпа паллашнă, ал арманĕпе авăртнине, вĕлле хурчĕ ĕрчетнине, йывăç касса тунине тата, паллах, чăваш тĕррине курнă.
Унтан уява уçнă. Пухăннисене саламланă май Михаил Васильевич кÿршĕллĕ икĕ республика хушшинчи культурăллă çыхăнусем упранса юлнă çеç мар, вĕсем çирĕпленсех пынине палăртса хăварнă.
Йăлана кĕнĕ йĕркепе праçник çĕре шалча çапса кĕртнинчен пуçланать. Çакă лайăх, ырă ĕç пуçланнине пĕлтерет.