00:00 28 июня 2011 г.
Раççей ял хуçалăх банкĕн республикăри филиалĕ Чăваш патшалăх ял хуçалăх академийĕн 5 студентне харăсах тата яланлăхах ĕçе йышăннă. Вĕсем пурте ял хуçалăх банкĕсем валли кадрсем хатĕрлемелли килĕшÿ тăрăх ятарлă курсра 2007 çултанпа пĕлÿ пухнă.
Филиал специалисчĕсем финанс сферин тĕрлĕ предмечĕпе кулленех тишкерÿллĕ те тарăн пĕлÿ паракан занятисем ирттернĕ. Экзаменсене банк директорĕ хăй йышăннă. Ятарлă уйрăмра вĕренекенсем «тăваттăран» япăхрах паллă илмен - унсăрăн вĕсене кунта тытман пулĕччĕç.
Çĕнĕ сотрудниксене ĕçе илнĕ чухне филиал унччен студентсене ансăр специализаципе вĕрентнĕрен йывăрлăхсемпе тĕл пулнă. Аграри банкĕн ĕç уйрăмлăхĕсене шута илсе вĕсене ятарлă курссенче çĕнĕрен пĕлÿ панă. Ку хутĕнче апла пулман. Банк ял хуçалăхне те, финанс тытăмне те лайăх пĕлекен, республикăра сайра тĕл пулакан çамрăк специалистсене кĕтсе илнĕ.
Республика ертÿçи М.Игнатьев ЧР Патшалăх Канашне янă «Çамрăксене шанмалла!» Çырăвĕнче калани халăх хуçалăхĕн кирек хăш сферинче те пурнăçа кĕрет. Академи ертÿçисем çамрăксене 4 курс хыççăнах банка ĕçе вырнаçма ирĕк панă.