00:00 28 января 2011 г.
Чăваш Енре Пĕтĕм Раççейри XXIX «Раççей йĕлтĕр йĕрĕ-2011» ăмăртăва хатĕрленме пуçланă. Кăçал вăл февралĕн 13-мĕшĕнче иртĕ. Республикăри кашни хулапа район центрĕнчех массăллă ярăнусем пулĕç. Тĕп старт - «Шупашкар: 500 çул» культурăпа кану паркĕнче.
Çак ăмăртусене паллă спортсенсемпе ветерансем, спорта юратакансем çулсеренех хутшăнаççĕ. Ача садне, шкула çÿрекенсем, аслă ăрури çынсем, професси шайĕнчи йĕлтĕрçĕсем ятарлă дистанцисенче ăмăртĕç. Сочире 2014 çулта иртекен хĕллехи Олимпиадăна халалласа VIP-чупу (2014 метра) пулĕ.
Спорт уявĕн çĕнтерÿçисене РФ Спорт, туризм тата çамрăксен политикин министерствин медалĕсемпе дипломĕсем, парнесем кĕтеççĕ. Çавăн пекех чи çамрăк тата чи ватă йĕлтĕрçе ятарлă призпа чыслĕç.