Новости » Энĕшпуç ял тăрăхĕ малти вырăнта

00:00 10 декабря 2010 г.

Атăлçи регионĕн центрĕн комиссийĕ 2010 çулта пурнăç хăрушсăрлăхне тивĕçтерессипе вырăнти чи лайăх хăй тытăмлăх органĕсен ĕç-хĕлне пĕтĕмлетнĕ. Комисси палăртнă тăрăх, пирĕн районти Энĕшпуç ял тăрăхĕ Атăлçи тăрăхĕнче чи лайăх ял тăрăхĕ ятне тивĕçнĕ. Ку енĕпе Чăваш Енре ятарласа конкурс иртнĕ. Комисси членĕсем 200 ытла ĕç пăхса тухнă. Пурнăç хăрушсăрлăхĕпе тивĕçтерекен ял тăрăхĕнче пушар деповĕ пулмалла, ытти обществăлла çурт-йĕрсенче хăрушсăрлăх правилисене çирĕп тытса пымалла. Асăннă требованисене Энĕшпуç ял тăрăхĕнче çирĕп тытса пыраççĕ. Кунта пушар деповĕ, икĕ пушар машини пур. Тĕрлĕ хыпарсене вырăнти влаç пушар деповĕнчен тухакан радиорубкăран пĕлтерет. Кашни çулах ял тăрăхĕнче пурăнакансемпе пушар хăрушсăрлăхĕн правилисемпе инструктаж ирттереççĕ. Çуллахи вăхăтра кашни килтех пичкепе шыв тата ытти хатĕрсем тытаççĕ. Палăртма кăмăллă: ял тăрăхĕнчен пушар хăрушсăрлăх службинче вăй хуракансем 36 ытла офицер тухнă. Вĕсем çĕршывăн тĕрлĕ кĕтесĕсенче вăй хураççĕ. Ялти шкулта хăйсен паттăрĕсене халалласа ятарласа музей йĕркеленĕ, ăна И.Криков ертсе пырать.